Улсын онцгой комисс Төрийн ордонд 13.00 цагт хуралдахаар болжээ. Монгол Улсын дотоодод гарсан халдварын тархалт өдөр бүр нэмэгдсэн хэвээр байгаа учраас Дэлхийн эрүүл мэндийн байгууллага болон Эрүүл мэндийн яамнаас хатуу хөл хорио тогтоосон хугацааг үргэлжлүүлэн 5-7 хоног сунгах саналыг Улсын онцгой комисст хүргүүлсэн байна.
Түүнчлэн, Засгийн газрын бүх яам, мэргэжлийн байгууллагаас санал авч байгаа аж. Хөл хорьсон хугацаанд нийгэм, эдийн засагт үүсч байгаа нөхцөл байдлын талаарх саналуудыг нэгтгэсний үндсэн дээр хатуу хөл хорио тогтоосон хугацааг дахин сунгах эсэх асуудлаар шийдвэр гаргах юм байна.
Хатуу хөл хорио тогтоосноос болж иргэн, ААН, бизнесүүдийн үйл ажиллагаа, орлого тасалдаж, цаашдаа хэвийн ажиллахад хүндрэл гарч байгаа учраас хөл хориог хэсэгчлэн сулруулах, эдийн засгийн хувьд тодорхой шийдвэр гаргахыг төр засгаас шаардаж байгаа билээ.
УОК-оос хөл хориог сунгах эсэхээр тодорхой шийдвэр гарсны дараа Засгийн газрын хуралдаанаас эцсийн шийдвэрийг гаргах юм.
