МХЕГ-ын байцаагчид авлигын гэмт хэргээр улсдаа тэргүүлэх байрыг булаацалдан жагсдаг болсныг АТГ-ын тоон баримтууд харуулдаг. Оймсондоо доллар нууж яваад гардуулсан томоохон гэмт хэргээс 700.000 мянган төгрөгийн авлига авсан гэмт хэргүүд ч тэнд жагсаж байдаг. Ийм салбарыг удирдахаар өнгөрсөн зун МАН-ын ЕНБД-аар ажиллаж байсан Т.Гантулга очсон байдаг. МАН Т.Гантулгад МЕХГ-ыг авлигачдаас салгаж, улсын байцаагчдад ёс зүй сахиулах үүрэг өгч томилсноос хойш багагүй хугацаа өнгөрчээ. Гэсэн хэдий ч МХЕГ-т байдал дээрдсэнгүй. Т.Гантулга дарга шүүхээр гэм буруутай нь тогтоогдсон хүмүүстээ ч арга хэмжээ авч чадаагүй явна. Тэдний нэг нь Нийслэлийн Мэргэжлийн хяналтын газрын дэд дарга С.Даваасүрэн гэгч этгээд. С.Даваасүрэн нь 2019 оны зургадугаар сарын 7-нд Чингэлтэй дүүргийн VII хорооны нутагт байрлах НМХГ-ын шатан дээр иргэн А.О-ын биед халдан эрүүл мэндэд нь хохирол учруулж, “Самсунг А-6” загварын гар утсыг нь гэмтээсэн хэрэгт холбогдсон бөгөөд гурван шатны шүүх түүнийг гэм буруутай гэж үзсэн юм. 2019 оны нэгдүгээр сарын 1-нээс мөрдөж буй Төрийн албаны тухай хуулийн 47.1-2 дахь хэсэгт “Гэмт хэрэг үйлдсэн нь нотлогдож шүүхийн шийтгэх тогтоол хүчин төгөлдөр болсон бол төрийн жинхэнэ албан хаагчийг албан тушаалаас нь хална хэмээн заасан байдаг. Шүүхийн шийдвэрийн дагуу С.Даваасүрэн төрийн албанаас чөлөөлөгдөх ёстой байсан ч өнөөдрийг хүртэл ажлаа хийгээд явж байгаа юм. Т.Гантулгыг даргаар очсоны дараа шүүхийн шийдвэр гарсан ч С.Даваасүрэн үүрэгт ажлаа хийгээд байгаа нь улсын байцаагчдын сонирхлыг татаж байгаа юм. С.Даваасүрэн нь 2000 оны эхээр яригдаж байсан “Хадгаламж банк”-ны 14.2 тэрбум төгрөгийн хэрэгт холбоотойгоор шалгагдаж, Бүртгэл тайлан тооцооны газрын даргаар ажиллаж байсан Ц.Чимэдцэрэнтэй казинод тоглож явсан этгээдийн нэг гэдэг. Ёс зүйн доголдолтой, төрийн жинхэнэ албан хаагчид баймгүй зан ааштай энэ хүндээ хэзээ зохих хариуцлагыг нь хүлээлгэх вэ Т.Гантулга дарга аа! Та хэдий болтол гэмт этгээдийг хаацайлах вэ?
Эх сурвалж: sharmedee .mn
