2020 оны 9 дүгээр сарын 23-ны өдөр Харилцаа холбооны зохицуулах хороо, Шударга өрсөлдөөн хэрэглэгчийн төлөө газар хамтран “Өрсөлдөөний тухай хууль”-ийн шинэчилсэн найруулгын төслийн урьдчилсан хэлэлцүүлгийг амжилттай зохион байгууллаа. Хэлэлцүүлэгт Харилцаа холбооны зохицуулах хороо, Шударга өрсөлдөөн хэрэглэгчийн төлөө газар Харилцаа холбооны салбарын тусгай зөвшөөрөл эзэмшигч аж ахуй нэгж байгууллагуудын төлөөллүүд оролцлоо.
Хэлэлцүүлгээр хуулийн төсөлд орсон гол өөрчлөлтүүд, бүтцийн өөрчлөлтүүдийг танилцуулсан бөгөөд хуулийн хамрах хүрээ, үйлчлэл, тулгамдаж буй асуудлуудыг нарийвчлан хэлэлцүүлсэн.
Оролцогчдоос тухайн хуулийн зарим нэр томьёоны тодорхойлолт тодорхой болгох, одоо үйлчилж буй хэм, хэмжээний хувьд байгууллага хооронд давхцал үүсэх зэрэг асуудал байгаа талаар санал өгсөн бөгөөд тус хуулийн ажлын хэсэгт салбарын төлөөллийг оролцуулан ажиллах талаар санал гаргаж энэ талаар хамтран ажиллахаар талууд харилцан тохиролцов.
