Пүрэв, 6 сар 24, 2021

ЕРӨНХИЙ САЙД “МАСКГҮЙ ЗУН”-ЫГ АМЛАЛАА, АМЖИХ УУ?

Ерөнхий сайд Л.Оюун-Эрдэнэ уржигдар мэдэгдэл хийлээ. Тэрээр “Дархлаажуулалтдаа идэвхтэй хамрагдаж, “COVID19”-гүй зуныг хамтдаа угтацгаая” гэлээ.

Товчоор хэлбэл, Ерөнхий сайд “маскгүй зун”-ыг амлалаа.

“Засгийн газраас дөрөв, тавдугаар сарыг дархлаажуулалтын сар болгон үндэсний хэмжээнд зарлаж байна. Өнөөдрөөс дархлаажуулалтын хүчин чадлыг хоёр дахин нэмэгдүүлж үндэсний хэмжээнд вакцинжуулах ажлыг эхлүүлж байна. Та бид хамтдаа хичээж, иргэдийн маань оролцоо өндөр байж чадвал тавдугаар сарын 1 гэхэд нийслэлийн насанд хүрсэн бүх иргэнийг, зургадугаар сарын 1 гэхэд хөдөө орон нутгийн насанд хүрсэн нийт иргэдээ эхний тунд хамруулж, долдугаар сарын 1 гэхэд нийт иргэнээ хос тунгаар хамруулах томоохон зорилтыг дэвшүүлэн ажиллаж байна” гэв.

Ерөнхий сайд Л.Оюун-Эрдэнэ өмнө нь, 2021 оны нэгдүгээр сарын 29-нд танхимаа бүрдүүлснийхээ дараа УИХ-ын чуулган дээр Засгийн газрынхаа ирэх гурван жилд хэрэгжүүлэх дөрвөн зорилтыг танилцуулж байв.

Тэр өдөр “Монгол Улс бүтэн 10 сарын турш дотооддоо алдалгүй барьж чадсан ч энэ зовлон биднийг тойрсонгүй. Манай Засгийн газар “COVID19” цар тахлыг даван туулах чиглэлд цогц төлөвлөгөө боловсруулж шуурхай ажиллана.

Хүн амаа вакцинжуулах нь бидний нэн тэргүүний зорилт. Цар тахлын голомтод ажиллаж буй ажилтан, албан хаагчид, эрсдэлтэй бүлгийнхэн, цаашлаад нийт иргэдээ ДЭМБ-ын зөвшөөрсөн вакцинд үе шаттай хамруулах ажлыг Засгийн газар эхний 100 хоногт багтаан зохион байгуулахын тулд бүх нөөц боломжоо дайчлан ажиллана” гэсэн. Мөн “Вакцинжуулалтыг шуурхай зохион байгуулснаар цар тахлаас улбаалсан эдийн засгийн болон нийгмийн хүндрэлийг богино хугацаанд даван туулах боломж бүрдэнэ. Цар тахлын нөлөөнд хамгийн их нэрвэгдсэн аж ахуйн нэгжүүд, ажил олгогч, жижиг дунд бизнес эрхлэгчдээ дэмжих цогц арга хэмжээг Засгийн газар  цар тахлыг даван туулах төлөвлөгөөнд тусгаж, үе шаттай шуурхай хэрэгжүүлнэ” гэж байв.

Тэгвэл Ерөнхий сайд энэ “ам”-аа хэрэгжүүлэхээр уржигдар дахин тодорхой амлалтыг өглөө.

Нийслэлд уржигдрын байдлаар дархлаажуулалтын 40-44 цэгт 90-97 багийн 650 ажилтан ажиллаж эхлэв. Өмнө нь өдөрт дунджаар 12 мянган хүнийг вакцинд хамруулж байсан бол цаашид өдөрт 30 мянга хүртэл ачааллаа нэмэх юм байна. Мөн вакцины татан авалт идэвхжиж буй ажээ. Тухайлбал, “Синофарм” үйлдвэрийн вакцины 900 мянган тунг ойрын үед авахаар болсон байна.

Ерөнхий сайдын танилцуулснаар Засгийн газар 2021 оны хоёрдугаар сарын 23-нас хойш 346 745 иргэн буюу насанд хүрсэн хүн амынхаа 16.3 хувийг вакцинжуулаад байгаа аж.

Нөгөөтэйгүүр Ерөнхий сайдын хувьд хөл хориог тавихаас аль болохоор зайлсхийж буйгаа удаа дараа хэлж байгаа. Тиймээс бид нийтээрээ Ерөнхий сайд, Засгийн газар, УОК-ын “гуйгаад” байгаачлан “Цар тахлын эсрэг тэмцэлд улс төржилт, талцал хуваагдалгүйгээр иргэн бүр нэгдэн нягтарч, эрүүл мэндээ хамгаалж, эдийн засгаа сэргээхийн төлөө хамтран ажиллах” ёстой болж байна. Өөрөөр хэлбэл, хүн бүр халдвар хамгааллын дэглэмээ ягштал барьж, вакцинжуулалтад хамрагдах үүрэгтэй болж байгаа хэрэг.

Ингэж чадаж гэмээнэ Засгийн газрын “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө” амжилттай хэрэгжиж. эдийн засгаа сэргээх цогц төлөвлөгөө хэрэгжих суурь нөхцөл нь бүрдэнэ гэсэн үг. Ерөнхий сайд үүнийгээ амлаж байна.

Гэхдээ Ерөнхий сайдын “Тавдугаар сарын 1 гэхэд нийслэлийн насанд хүрсэн бүх иргэнийг, зургадугаар сарын 1 гэхэд хөдөө орон нутгийн насанд хүрсэн нийт иргэдээ эхний тунд хамруулж, долдугаар сарын 1 гэхэд нийт иргэнээ хос тунгаар вакцинд хамруулах” амлалт биелэхэд амаргүй. Ийм өрсөлдөөн дундаас Монгол Улс вакцин олж ирээд ердөө гурван сарын дотор улсаараа дархлаажна гэдэг хэцүү.

Учир юу гэвэл “COVID19” цар тахлыг даван туулах цорын ганц арга зам нь вакцин болоод байгаа юм. Тиймээс өнөөдөр дэлхийн улс орнууд цар тахлын эсрэг төлөө уралдаж байна.

Дэлхийн хүн амыг вакцинжуулахад багадаа хоёр жилийн хугацаа орно гэсэн тооцоог олон улсад гаргажээ. Одоогоор дэлхийн хүн амын 1.8 хувийг хос тун вакцинд хамруулсан мэдээлэл байгаа юм.

Эх сурвалж: “Зууны мэдээ” сонин

Холбоотой нийтлэл

Сэтгэгдэл

ХАРИУ ҮЛДЭЭХ

Сэтгэгдэл оруулна уу!
энд нэрээ оруулна уу

Advertisment

Ирэлт ихтэй

У.Хүрэлсүх МАН-ын даргын үүрэг гүйцэтгэгчээр Л.Оюун-Эрдэнийг нэр дэвшүүлжээ

Монгол ардын намын Удирдах зөвлөл өнөөдөр хуралдаж намын даргын үүрэг гүйцэтгэгчийг сонгох асуудлыг хэлэлцжээ.  УИХ-ын гишүүн, МАН-ын дарга У.Хүрэлсүх Монгол Улсын Ерөнхийлөгчөөр сонгогдсоноор улс төрийн намын...

Т.БЭГЗСҮРЭН:ХӨЛ ХОРИХГҮЙ БОЛ ИРЭХ АРАВДУГААР САРД ХАЛДВАРЫН ТОО 220 МЯНГАД ХҮРНЭ

Эрдэмдийн зөвлөлөөс хөл хорио тогтоох саналаа УОК-т хүргүүлсэн билээ. УОК-ын дэргэдэх Эрдэмтдийн зөвлөлийн гишүүн доктор Т.Бэгзсүрэн цар тахлын нөхцөл байдлын талаар болон хөл хорио тогтоох...

Цар тахлын цаадах МАН-ын “зодоон”

Хүн төрөлхтөн таньж мэдэхгүй, нэн шинэ тахалд нэрвэгдээд хоёр жил боллоо. Мутацлагдсан вирус бүхий шинэ хэлбэрээр дахин дахин тархаж, дэлхийн улс гүрнүүд үзэж байгаагүй...